Home LAO – Reforming higher education in Laos

“ການປະຕິຮູບການສຶກສາຊັ້ນສູງ ສປປ ລາວ:

ການປູກຝັງວັດທະນະທໍາການປະກັນຄຸນນະພາບພາຍໃນທີ່ຈໍາເປັນສໍາລັບການຈັດຕັ້ງປະຕິບັດແນວທາງການສຶກສາແບບອີງໃສ່ຜົນການຮຽນເປັນຫຼັກ.”

ໂຄງການ REAL ແມ່ນໂຄງການແນວໃດ?

ໂຄງການການປະຕິຮູບການສຶກສາຊັ້ນສູງໃນ ສປປ ລາວ – ຫຼື ໂຄງການ REAL – ແມ່ນໂຄງການໜຶ່ງ ນອນໃນຂົງເຂດທີ 3 ຂອງ ໂຄງການ Erasmus+ ເພື່ອການເສີມສ້າງຂີດຄວາມສາມາດ ຂອງການສຶກສາຊັ້ນສູງ. ໂຄງການ REAL ແມ່ນສົ່ງເສີມ ການປະຕິຮູບໂຄງສ້າງການສຶກສາຊັ້ນສູງ ເພື່ອເຮັດໃຫ້ການຈັດຕັ້ງປະຕິບັດ ແນວທາງການສຶກສາແບບອີງໃສ່ຜົນການຮຽນ (OBE) ໃຫ້ມີປະສິດທິຜົນ, ສ້າງຍຸດທະສາດ, ກົນໄກ ແລະ ແຫຼ່ງຊັບພະຍາກອນທີ່ຈຳເປັນ ເພື່ອເຮັດໃຫ້ ລະບົບການສຶກສາຊັ້ນສູງຂອງ ສປປ ລາວ ທັນສະໄໝ.

ການປ່ຽນແປງທາງດ້ານໂຄງສ້າງການສຶກສາຊັ້ນສູງ ທີ່ຈຳເປັນຈະສຳເລັດລົງໄດ້ ແມ່ນອາໃສການປະສານຮ່ວມມືກັນຢ່າງໜຽວແໜ້ນລະຫວ່າງຄະນະນຳຂັ້ນສູງຂອງການສຶກສາຊັ້ນສູງຂອງ ສປປ ລາວ – ກະຊວງສຶກສາທິການ ແລະກິລາ ຮ່ວມກັບ 4 ມະຫາວິທະຍາໄລ (ມະຫາວິທະຍາໄລແຫ່ງຊາດ (ມຊ), ມະຫາວິທະຍາໄລສຸພານຸວົງ (ມສ), ມະຫາວິທະຍາໄລຈຳປາສັກ (ມຈ) ແລະ ມະຫາວິທະຍາໄລສະຫວັນນະເຂດ (ມຂ)); ແລະ ດ້ວຍການສະໜັບສະໜູນຊ່ວຍເຫຼືອຈາກຄູ່ຮ່ວມໂຄງການທັງ 4 ຈາກ ສະຫະພາບເອີລົບ (EU) ທີ່ມີປະສົບການສູງໃນການຊຸກຍູ້ໃຫ້ບັນດາສະຖາບັນ ແລະລະບົບການສຶກສາຊັ້ນສູງຂອງ ສປປ ລາວ ກ້າວໜ້າທັນສະໄໝ.

ທີມງານນັກວິຊາການຈະຈັດຕັ້ງປະຕິບັດໂຄງການພາຍໃຕ້ການຊີ້ນຳຢ່າງໃກ້ຊິດຂອງຄະນະນຳການສຶກສາຊັ້ນສູງ ຂັ້ນສູນກາງ (ກະຊວງສຶກສາທິການ ແລະກິລາ) ກໍ່ຄືຂັ້ນມະຫາວິທະຍາໄລ, ພ້ອມທັງພະຍາຍາມດຶງເອົາຕົວແທນຈາກຕະຫຼາດແຮງງານ, ສິດເກົ່າ, ນັກສຶກສາທີ່ກຳລັງຮຽນຢູ່, ແລະຈາກພາກສ່ວນ ການສຶກສາ ກຽມມະຫາວິທະຍາໄລ ໃຫ້ເຂົ້າມາມີສ່ວນຮ່ວມນຳ. ກອງປະຊຸມເຜີຍແຜ່ຂອງໂຄງການ REAL ໃນແຕ່ລະຄັ້ງແມ່ນຈະຮັບປະກັນວ່າ ສະຖາບັນການສຶກສາຊັ້ນສູງຂອງ ສປປ ລາວ ທັງໝົດຈະສຸມຈິດໃຈໃສ່ ການປະຕິຮູບການສຶກສາຊັ້ນສູງ ທີ່ໄດ້ຮັບການສະຫນັບສະໜູນໂດຍ ໂຄງການ REAL ໃຫ້ປະກົດຜົນເປັນຈິງ.

ໂດຍເນັ້ນໃສ່ການປະຕິຮູບຂະແໜງການສຶກສາຊັ້ນສູງຂອງ ສປປ ລາວ ໃຫ້ມີຄວາມທັນສະໄໝ, ຄວາມສອດຄ່ອງ, ມີຄຸນນະພາບ ແລະຂີດຄວາມສາມາດໃນການຕອບສະໜອງໄດ້ ຕາມຄວາມຕ້ອງການທີ່ຈຳເປັນ ເພື່ອຊ່ວຍສົ່ງເສີມການຂະຫຍາຍຕົວຂອງ ເສດຖະກິດ-ສັງຄົມ ແລະຄວາມຈະເລີນຮຸ່ງເຮືອງ ຂອງ ສປປ ລາວ, ຄູ່ຮ່ວມໂຄງການ REAL ມີຄວາມມຸ້ງໝັ້ນທຸ້ມເທປະຕິບັດໂຄງການດັ່ງກ່າວນີ້ ເພື່ອໃຫ້ເກີດປະໂຫຍດສູງສຸດແກ່ຂະແໜງ ການສຶກສາຊັ້ນສູງ ຂອງ ສປປ ລາວ ແລະບັນດາພາກສ່ວນທີ່ກ່ຽວຂ້ອງ ເຊັ່ນ: ນັກສຶກສາ, ນັກວິຊາການ ແລະ ສະຖາບັນການສຶກສາຊັ້ນສູງ, ອົງການຈັດຕັ້ງ ທີ່ຮັບຜິດຊອບ ການສຶກສາຊັ້ນສູງ ແລະ ສັງຄົມລາວໂດຍລວມ.

ພວກເຮົາຕ້ອງການຈະບັນລຸຈຸດປະສົງຫຍັງແດ່?

ຈຸດປະສົງລວມຂອງໂຄງການ REAL ແມ່ນເພື່ອ: ສົ່ງເສີມການປະຕິຮູບໂຄງສ້າງ ການສຶກສາຊັ້ນສູງ ເພື່ອການຈັດຕັ້ງປະຕິບັດແນວທາງການສຶກສາແບບອີງໃສ່ຜົນການຮຽນໃຫ້ມີປະສິດທິພາບ, ສ້າງຍຸດທະສາດ, ກົນໄກ ແລະຊັບພະຍາກອນທີ່ຈໍາເປັນເພື່ອເຮັດໃຫ້ລະບົບການສຶກສາຊັ້ນສູງ ຂອງ ສປປ ລາວ ມີຄວາມທັນສະໄໝ.

ໂຄງການ REAL ມີ 4 ຈຸດປະສົງສະເພາະ ຄື:

– ສ້າງຍຸດທະສາດທີ່ສາມາດຮັບປະກັນຄວາມສອດຄ່ອງເໝາະສົມ ຂອງຂະແໜງການສຶກສາຊັ້ນສູງ, ເພື່ອໃຫ້ມະຫາວິທະຍາໄລໃນ ສປປ ລາວ ສາມາດຕອບສະໜອງໄດ້ຕາມຄວາມຕ້ອງການ ທາງດ້ານເສດຖະກິດ-ສັງຄົມຂອງປະເທດ;

– ປະຕິບັດກົນໄກທີ່ສາມາດຮັບປະກັນຄວາມເປັນໄປໄດ້ຂອງໂຄງການ ຫຼັກສູດການສຶກສາຊັ້ນສູງ, ສະໜັບສະໜຸນການປັບປຸງໂຄງສ້າງການສຶກສາຊັ້ນສູງ ແບບຍືນຍົງ ແລະ ສົ່ງເສີມນະວັດຕະກໍາໃນລະບົບການສຶກສາຊັ້ນສູງ ຂອງ ສປປ ລາວ;

– ສົ່ງເສີມພັດທະນາຂີດຄວາມສາມາດນັກວິຊາການ, ຄະນະຮັບຜິດຊອບ ພັດທະນາໂຄງການຫຼັກສູດ ແລະ ມະຫາວິທະຍາໄລ ເພື່ອຮັບປະກັນ ປະສິດທິຜົນຂອງການສິດສອນທີ່ຕ້ອງການເພື່ອປະຕິບັດ ແລະ ຕິດຕາມ ຂະບວນການປະຕິຮູບການສຶກສາຊັ້ນສູງ;

– ສົມທົບກັບອົງການຈັດຕັ້ງທີ່ກ່ຽວຂ້ອງຂັ້ນສູນກາງ ແລະຂັ້ນສະຖາບັນການສຶກສາຊັ້ນສູງ ໃນການກຳນົດ ແລະ ສົ່ງເສີມການຮັບຮອງ ເອົາການຈັດຕັ້ງວຽກງານຮັບປະກັນຄຸນນະພາບພາຍໃນຢ່າງຮອບດ້ານ ເຊິ່ງສາມາດຮັບປະກັນການປ່ຽນແປງທາງດ້ານໂຄງສ້າງການສຶກສາຊັ້ນສູງ ແບບຍືນຍົງ ແລະ ສອດຄ່ອງ.

ຄະນະຈັດຕັ້ງປະຕິບັດໂຄງການ

ໂຄງການ REAL ແມ່ນໂຄງການຮ່ວມມືຈັດຕັ້ງປະຕິບັດໂດຍ: ກະຊວງສຶກສາທິການ ແລະ ກິລາ, ມະຫາວິທະຍາໄລ 4 ແຫ່ງ ຂອງ ສປປ ລາວ ແລະ ສະຖາບັນຄູ່ຮ່ວມໂຄງການຈາກສະຫະພາບເອີຣົບ 4 ແຫ່ງ.